يناير 28, 2023 @ 7:08

قبل يومين (ولدنا) نادر العبيد فى تسجيل قال انه رسالة للبرهان وحميدتي والاستخبارات ومدير المخابرات و …و …و يقول فيها ان بعضا من قحت المركزي (سافر جوبا) للقاء الحلو . ونادر وجه ما يشبة الاستغاثة ان يدركوا هؤلاء حتى لا (يطبقوا) على الجيش السوداني داخل الخرطوم بحسب (كلامو)

طيب الجديد شنو ؟
الجديد ان بيانا (لافي فى الميديا) هذا اليوم ممهور بتوقيع الصديق الصادق عن حزب الامة ( و اللا بلاش الصديق حااافة كده) خلينا نقول (السيد) الصديق والسيد عادل ابراهيم شالوكا عن الحركة الشعبية (بتاعت الحلو)
قالوا …
انهم اجتمعوا ب (جوبا) فى الفترة من يومي الخميس والجمعة (١٩، ٢٠) يناير الجاري
وناقشوا …..
(بالله عاوزك تركز معاي فى الجمل الاتية) …
بنفس عميق ! و موضوعي ! وشفاف وسؤول فى (هاااااذا) الظرف التاريخي المفصلي الذى تمر به بلادنا .
(شفتا الكلام ده كيف)؟
و قال (ليك) اضطلع حزب الامة علي رؤية حركة الحلو التى تقوم على فصل الدين عن الدولة!
(ودي عاوزا ليها إضطلاع يا جماعة)؟ زول قال ليك ما داير دين فى الحكم تانى فى شنو؟

(طيب) ….
واتفقوا على (٧) نقاط . و رأفة بالقارئ الكريم لن اكتبها لانها قديمة ومكررة ومسيخة كمان
المحصلة …
الوفد الذى ذكره (ولدنا) نادر يوم داك ذكر فيه بجانب الصديق ومريم ناس تانيين من قحط!
السؤال …
ليه دقسوا اولاد الصادق (المساكين ديل) للتوقيع باسم حزب الامة وليس باسم (قحط . ون) ؟
مااا ده سؤال منطقي بقول كده . واللا تكون دي (الحلة التانية)

كما نقل عن الراحل جون قرنق ان حزب الامة دوما ما (يشد حلتين) حلة مع الحكومة والاخرى مع المعارضة فايهما تستوي اولا فسيأكل منها .

قبل ما انسى :–
اوع تقول لى دى الحلة (التانية) بعد ان شعر الحزب ان حلة الاطارى (حرقت) !
اتااااريه ….
محن زمن بصحيح

الاثنين ٢١/ يناير ٢٠٢٣م


اضغط هنا للانضمام لمجموعات الانتباهة على تطبيق واتساب